2007

Ég var að skoða einhver blogg, því mér leiðist óheyrilega og flest þeirra eru með svona líta til baka móment. Og þar sem mér leiðist ennþá og myndin sem er í tækinu er bara alltí lagi en ekkert greit þá ákvað ég að gera líka svona sneddí.

• Ég vann í bestu og uppáhaldsvinnu fyrr og síðar.
• Íris  tjáði mér það að hún væri sperminated og ég fékk áfall en náði mér svo.
• Datt af hestbaki, braut á mér nefið, reif vörina frá andlitinu og horfði á heila seríu af house á einni og hálfri viku. Og var í lyfjamóki þessa einu og hálfu viku og hélt kjörís uppi með hlunkaáti.
• Fékk besta tölvupóst í heimi á meðan ég leit út eins og fílamaðurinn en gat ekki brosað yfir fréttunum vegna bólgu. Komst inní dýralæknanámið.
• Seinna kom í ljós að Anna væri að fara til Sverge í skiptinám (eða var það á líkum tíma).
• Ég, Hans og Lygi stofnuðum eitt öflugasta þríeyki sem sögur fara af og dönsuðum alla dansara útaf stöðunum dántán.
• Bumban á Írisi stækkaði og stækkaði.
• Ég fékk tanórexíu um sumarið og lá eins og rotuð í öllum hádegishléum þegar sólin lét sjá sig. Íris tók þátt í því með mér en ég vann brúnkukeppnina.
• Sumarið fór í fiskát, rauðvínsdrykkju, gin og tónik, hestbak, sund, vinnu og almenna gleði.
• Tímamótaskipti: inam til ungverjalands, Anna til sverge, íris mamma, hans að vinna með "kærasta mínum" og los lygos að kenna.
• Nýtt fólk í mínu lífi í Búdapest. Ekta stúdentalíf.
• Hansel keypti sér glæsilega íbúð rétt hjá stangó, planið er að fara í matarboð þar í sumar.

Svo er 2008 að koma núna. Er að spá í hvað ég get gert magnað til að skrifa um að ári. Við sjáum til, kannski ég geri bara ekkert magnað. Better yet; kannski ég plani ekkert.

Ólíver

Í gær fór ég ásamt fríðu föruneyti á skemmtistaðinn sem bannar hettupeysur; aka Ólíver. Það er alltaf rosalega mikið af fallegu fólki á Ólíver og oft er það líka appelsínugult á litinn. Við sátum þarna allmörg og drukkum gvuðaveigar og höfðum hátt. Þegar ég fór út til að smögga mig þá heyrði ég útundan mér stelpuskottu vera að tala um að frægur leikstjóri væri á leiðinni á Ólíver; vá en frábært. Þegar ég kom niður þá var frægi leikstjórinn og vinir hans komnir.......Tarantínó og Eli Roth. Commoooon, ómyndarlegustu menn í kvikmyndabransanum, þannig það var ekkert meira spennandi við það. En ó mæ ó mæ, stelpurnar á staðnum voru ekki sammála mér. Þær hentu sér þarna fyrir hann og svo valdi hann það sem honum leist á, ein ógesslega heppinn fékk að skiptast á munnvatni við hann, önnur dillaði risabrjóstum framaní hann. Eli var ekkert skilinn útundan en það var ein sem var búin að hertaka hann og fældi alla hugsanlega keppinauta frá með ógnvænlegu augnaráði.

Mér leið dáldið eins og gamalli kerlingu því það hnussaði í mér hægri vinstri. Var það ekki einmitt Tarantínó sem fór í eitthvað viðtal þar sem hann lýsti því yfir að íslenskar stelpur væru auðveldar og þær kæmu til hans og ekki öfugt og svo var það líka frítt. Ojojojoj.....Það má vel vera að íslenskar stelpur séu auðveldar sem er svo sem í lagi en þegar það er komið útí það að þær nánast fara úr fötunum inná skemmtistaðnum og leggjast svo á borðið fyrir framan.....ææææ það finnst mér dáldið lágt legist.  Er svona spennandi að komast í séð og heyrt? Enda magnað tímarit þar á ferð,

Vá jólin

Ég hef aldrei borðað eins lítið af súkkulaði yfir jólin og núna. Held að allt í allt sé ég búin að borða tvo konfektmola.....ég bjóst aldrei við að þessu; að geta hamið súkkulaðiinntöku. Þannig ég er ekki full samviskubits yfir gúffi eða óhollustu. Og ég er ekki með þrútna putta eftir kjötát þarsem ég borða ekki kjöt. Diskurinn minn var þakinn salati, grænum baunum, rósakáli, rauðkáli (mmmmm.....rauðkál er svo gott) og svona góðu stöffi. Og svo hafði ég ekki einu sinni lyst á ís......magnað! En í dag langar mig dáldið í serrano.

Ísland

Komin á klakann

Vávávívá

Íslenska elítan bara bloggar og bloggar. Roslega er það skemmtilegt að þau séu að deila þankagangi sínum með almúganum. Færir okkur öll nær hvert öðru...

Ég er að koma heim eftir 5 daga. Jibbí kóla! 

arg

Helv..,ands...,djö....

Þetta er ógeðslega mikið efni. Gerði mér enga grein fyrir því fyrr en ég fyrradag þegar ég byrjaði að lesa þetta. Buhu; er sumsé að fara í endurtektarpróf í janúar í skriflega anatómíuprófinu, enginn dúfnaskítur eða gin og tónik geta bjargað þessu. Crap....en það er ágætt að fara á mánudaginn og sjá hvernig þetta er próf er uppsett og allt það þar sem það eru engin sampletest neinstaðar.

Ég er með hausverk. Veit ekki afhverju, kannski er of heitt hérna inni eða kannski væri ekki vitlaust að fara út í loftið og láta sér verða aðeins kalt. 

Ég hélt ég þyrfti að lesa um 50 efni, kemur í ljós að efni nr. 5,6,7,8,9......nei já; ÖLL. Eru ca 3 efni hvert. Þannig er eitt efni um um einhver bein og svo sjúbb, vöðva í andliti. Sambærilegt; nei! Kvikindslegt; já, mjög svo!

Þannig ég er ekkert í voða góðu skapi akkúrat þessa stundina. Get ekkert gert nema lesið þetta yfir og vonað að eitthvað af því síist inn en það verður ekki helmingurinn og ætli það sem fesist verði ekki eitthvað sem ég þarf svo ekkert að vita. oooooooooooooo.....asnalegt!

Flatmate keypti samt piparkökur í Ikea....vá hvað ég var glöð! Þannig ég er búin að borða piparkökur og mandarínur og kaffi í allan dag.

.....

Vaknaði klukkan sjö í morgunn, bjó mér til rótsterkt kaffi, drakk það og reykti sígarettu. Setti hárið í hnút á miðjan hnakkan, setti á mig maskara og smá kinnalit, fór í falleg brún stígvél. Fór út. Gleymdi að minnast á að ég tók nokkrar öndunaræfingar eftir kaffidrykkjuna.

Hitti Fridu og Annie fyrir utan skólann og í sameiningu löbbuðum við til Erell. Töluðum um anatómíu og sötruðum gin og tónik með læm og reyktum sígarettur. Korter í tíu þurfti ég að pissa og tíu mín í tíu fórum við í fyrsta alvarlega munnlega/verklega prófið af mörgu.  Pissuðum í kór fjórum mínútum fyrir prófið og héldum svo inní disecting room með dúndrandi hjartslátt sem hefði eflaust verið meiri hefðum við ekki fengið okkur ginið og tonikið. 

Kláraði prófið á ca. 40 mínútum og kennarinn hlustaði ekki einu sinni á mig þegar ég benti og talaði um vöðvana titrandi röddu. Horfði ekki á mig þegar hann sagði: "Þú ert hér, færð fimm, til hamingju". Svo labbaði hann í burtu og ég gerði slíkt hið sama, hæst ánægð með árangurinn en dáldið svekkt fyrir að hafa fengið svona auðavelt efni að leysa.....en þakklát þó.

Drakk tvo bjóra og labbaði svo heim. Útað borða í kvöld en læra þangað til; it aint over till the fat lady sings...

ps. Fimm er hæsta einkunn hérna.....bara þannig þið vitið það! 

  

It all comes down to

heppni og taugar. Ef þetta tvennt vinnur með mér á morgunn þá ætti ég að vera on the safe side. Ef þetta tvennt vinnur ekki með mér á morgunn þá er líklegt að ég ráfi um götur Búdapest með úfið hár og grátbólgin augu......eða ekki.

Prófið er klukkan tíu á morgunn en klukkutíma áður ætla ég að hitta samnemanda og við ætlum að afstressa okkur aðeins. Ef ég gæti spólað áfram ca. 16 klukkutíma myndi ég gera það; í staðinn ætla ég að lesa þetta í grilljónasta skiptið.

Eftir prófið ætla  ég að fá mér bjór, svo ætla ég heim að læra fyrir skriflega prófið og svo....og svo (ljúfurinn, hann er farinn útað leika sér....) ætlum ég og Erell að fara í ammælisdinner fyrir mig á Mensa sem er megagóður staður og ég ætla að fá mér besta túnfisksalat í heimi og drekka með því hvítvín. Ég hugsa að ég sleppi eftirrétt þar sem túnfisksalatið er dálið stór réttur. Hugsa að ég fái mér heldur annað hvítvínsglas áður en ég fer heim og horfi á þátt um eitthvað hressandi (drama í Manhattan, lýtalækningar eða eitthvern svona plastþátt). Og svo verð ég ógesslega hress á föstudaginn þegar við tekur lærimaraþon þar sem ég þarf að komast yfir ca. 35 topic fyrir mánudaginn! Þetta augljóslega gerist bara ef ég næ á morgunn. Ef ég næ ekki, þá hugsa ég að ég komi ekkert heim fyrr en undir föstudagsmorgunn. 

Og í þessum töluðu orðum ætla ég að halda áfram að lesa þessa geggjað skemmtilegu bók áður en ég fer að hitta manninn með hundinn sem heldur því statt og stöðugt fram að ég sé grísk þar sem ég sé með grískan hreim (aldrei komið til Grikklands). Þetta er ekki nýr kæró ef þið eruð að spöklera; þetta er krufningamaðurinn. 

Krossa putta! 

Okidoki

Þá er ég búin með öll þau midterm sem eru á þessari önn. Fékk ágætiseinkunn í stærðfræðinni 17.6 stig af 25 sem þýðir að ég þarf að ná 13 stigum á lokaprófinu til að ná. Og það get ég sagt ykkur að mér er nokk sama hvort ég nái með 2 eða 5.

Nú ætla ég að einbeita mér að anatómíu. Er að fara í auka krufningatíma í kvöld og er svo búin að búa til plan fyrir morgundaginn. 

Exjúllí, þá ætla ég að fara að drífa mig! 

Brugðist við kvörtun

Ég fékk semikvörtun í gær í gegnum msn; sem var einhvern veginn á þennan máta:

T: Þú verðu að fá þér myndavél

ég: En ég á myndavél, ég er bara ekkert rosalega dugleg að taka myndir.

T: Það er mjög auðvelt, þú miðar á það sem þú ætlar að taka mynd af og styður svo þéttingsfast á takka sem er ofan á myndavélinni.

ég: Já er það þannig sem það virkar. Anna var hérna í fjóra daga og hún tók bisillján myndir af húsum og styttum og svona.

T: Þannig á að gera það.

Ég hugsaði um þetta í dag og tók eina mynd af skrifborðinu mínu en ég aftur á móti bjó til flickr skrá og þar mun ég setja allar þær myndir sem ég nenni að taka.