Strákar og stelpur!

Ég las blogg ekki alls fyrir löngu þar sem myndarlegur maður óskapaðist yfir kvenmannsleysinu á Íslandi, þ.e.a.s að allar konur væru fráteknar. Sjálf hef ég kvartað sáran yfir þessu; að hver einasti karlmaður sem eitthvað er varið í (útlitisleg meina ég þá) sé annað hvort frátekinn eða ekki alveg hentugur góðum stúlkum eins og mér. Þegar ég nefndi þetta við bróðir minn sem er yfirleitt með allar staðreyndir á hreinu, benti hann mér að eflaust væri þetta rétt hjá kauða...þ.e kvenmannsleysið. Skv. Hagtölum frá 2006 þá eru 5000 fleiri karlmenn á landinu en konur. Og þá spyr ég: Hvar í ósköpunum eru þeir allir? Það er ég viss um að þessi 5000 eru annað hvort á aldrinum 1-17 ára eða 37-103 ára. Sem þýðir það að ég þarf að fara ansi langt niður fyrir mig eða fjárfesta með reglulegu millibili í Viagra til að deyja ekki með sambandinu. 

En það verður að segjast að hann hefur tölurnar með sér...það hef ég ekki! Hugsanlega hef ég óheppnina með mér en mér eins mikil vorkunn.  

Reyndar er önnur staðreynd sem íslenskir karlmenn sem hræðast einlífið gætu íhugað. Í Líbanon eru fjórar konur á hvern einn mann. Ástæðan er sú að menn fara úr landi í tekjuleit, flytja bisness í bisnessvænni lönd eða flýja stríðið. Það er ekki eins auðvelt fyrir konur að taka til sitt hafurtask og flytja úr landi, þannig þær sitja eftir með sárt ennið og berjast með kjafti og klóm um hvern karlmann! Ef einhver ætlar að segja mér að það sama gildi með karlmenn í Kína og Indlandi....dont bother! Ég veit það vel, enda er ég að íhuga að setjast þar að og eiga nokkra eiginmenn!